۸صبح، کابل: د افغانستان لپاره د امریکايي سفارت شارژدافیرې کرن ډېکر ویلي چې د دوحې په درېیمه ناسته کې د ډېرو هېوادونو استازو افغان مېرمنې د خپلو ستراتیژو لومړیتوب ګڼلی دی.
ډېکر دوشنبه د زمري پر لومړۍ له خبریالانو سره پر لیکه یوې ناستې ته ویلي چې د افغانستان لپاره د ملګرو ملتونو د ځانګړي استازي ګومارنه لاهم پر خپل ځای ده.
نوموړې زیاته کړې: «طالب استازو ته خبرداری وکړل شو که افغانستان خپل نیمايي نفوس همداسې څنډې ته پرېږدي، بریالی کېدای نه شي.»
د هغې په خبره، د هېوادونو استازو له طالبانو غوښتي چې د ملګرو ملتونو ټول کنوانسیونونه پلي کړي.
ډېکر زیاته کړې چې دغو استازو د افغانستان په اړه د ملګرو ملتونو خپلواکو ارزونو پر دوام ټينګار کړی دی.
د دوحې درېیمه غونډه د روان کال د جون پر ۳۰مه او د جولای پر لومړۍ په سیاسي او سولې چارو کې د ملګرو ملتونو د سرمنشي مرستیالې روزمیري ډيکارلو په مشرۍ جوړه شوې وه.
پر دې ناستې له هغې وروسته نیوکې ډېرې شوې چې د طالبانو سیاسي او ښځو استازو ته پکې د ګډون بلنه ورنه کړل شوه.
