۸صبح، جوزجان: په جوزجان کې د ترافیکو ادارې طالب چارواکي وايي چې په دغه ولایت کې د ترافیکي پېښې په پاېله کې د یوې کورنۍ اته غړي مړه شوي دي.
په جوزجان کې د ترافیکو ادارې د طالبانو تر کنټرول لاندې باختر خبري اژانس ته ویلي چې دا پېښه یکشنبه د چنګاښ پر ۱۷مه له غرمې وروسته د شبرغان – میمنې لویې لارې د «خواجه دوکوه» ولسوالۍ اړوند کې شوې ده.
په دې پېښه کې د څلورو ماشومانو او یوې ښځې په ګډون اته کسان مړه شوي.
د پېښې لامل د موټر چلوونکي بېاحتیاطي بلل شوې ده.
د یادونې ده چې څو ورځې وړاندې په سمنګان او فاریاب کې د دوو جلا ترافیکي پېښو په پاېله کې شپږ کسان مړه او درې نور ټپيان شوي وو.
په افغانستان کې هر کال د ترافیکي پېښو په پاېله کې سلګونو کسانو ته مرګژوبله اړوي.
د ډېرو ترافیکي پېښو لامل د چلوونکو بې احتیاطي، ترافیکي قوانینو ته نه پاملرنه، د سړکونو خرابوالی او د ترافیکي نښو کمی ګڼل کېږي.
