۸صبح، تخار: په تخار ولایت کې په یوه ترافیکي پېښه کې اته کسان مړه او څلور نور ټپیان شوي دي.
د طالبانو تر کنټرول لاندې باختر خبري اژانس چهارشنه، د تلې په لومړۍ نېټه، راپور ورکړی چې دغه پېښه تېره شپه د تخار د کلفګان ولسوالۍ په ګزیستان سیمه کې شوې ده.
په تخار کې د طالبانو د امنیه قوماندانۍ د مسوولانو په وینا، دغه پېښه هغه مهال شوې چې یوه باروړونکې موټر له سړکه ووت او چپه شو.
طالبانو همداراز ویلي چې د دې پېښې ټپیان د تخار ولایتي روغتون ته لېږدول شوي دي.
دا په داسې حال کې ده چې د هېواد په بېلابېلو ولایتونو کې د موټرچلوونکو د بېاحتیاطۍ، د سړکونو د خرابوالي او د ترافیکي قوانینو د نه رعایت له امله ترافیکي پېښې زیاتې شوې دي.
پرون هم په لغمان ولایت کې په یوه ترافیکي پېښه کې یو کس مړ او نهه نور ټپیان شوي وو.
