د ترکیې ولسمشر رجب طیب اردوغان وايي، ملګري ملتونه نور د نړیوالې سولې او امنیت د ساتلو لپاره د خپلې دندې ترسره کولو توان نه لري او په ټوله نړۍ کې د جګړو او کړکېچنو پر وړاندې د دې مسوولیت په ترسره کولو کې پاتې راغلي دي.
ملګرو ملتونو چهارشنبه د سپټمبر پر ۲۳مه، راپور ورکړی چې اردوغان ویلي، دغه سازمان ۸۱ کاله وړاندې د نړیوالې سولې او امنیت د ساتلو لپاره جوړ شو، خو اوس «د دې کار په ترسره کولو پاتې راغلی دی».
اردوغان ویلي، د خپلو موخو په ترلاسه کولو کې د ملګرو ملتونو د پاتې راتلو د لیدلو لپاره کافي ده چې تېرو ۱۲ میاشتو ته وکتل شي؛ هغه دوره چې د ده په وینا، سلګونه زره کسانو پکې خپل ژوند له لاسه ورکړی دی.
هغه ویلي، دا دوره په تېرو ۳۰ کلونو کې له تر ټولو خونړیو دورو وه او د نړۍ په بېلابېلو برخو کې له ۶۰ ډېرې شخړې او جګړې، له غزې او اوکراین نیولې تر ایران او لبنان پورې، روانې وې.
اردوغان زیاته کړې چې په فلسطین، لبنان، سوډان او نورو کړکېچنو سیمو کې هغه کسان چې ملګرو ملتونو ته یې هیله لرله، « په ژوره توګه ناهیلي» شوي دي.
د ترکیې ولسمشر په ځانګړې توګه د فلسطینیانو د وضعیت په اړه اندېښنه څرګنده کړې او ویلي یې دي چې هغې بېعدالتۍ چې د غزې او لوېدیځې غاړې خلک ورسره مخ دي، «د بشریت وجدان په ژوره توګه ټپي کوي».
