۸صبح، کندهار: د کندهار ځينې اوسېدونکي د برېښنا له لوړو لګښتونو او پرلپسې پرچاوۍ شکایت لري.
هغوی یکشنبه د زمري پر ۱۸مه ۸صبح ورځپاڼې ته وویل چې د برېښنا له پرلپسې پرچاوۍ سربېره، په دغه ولایت کې د تېرو درېیو میاشتو لګښتونه شاوخوا دوه برابره شوي دي.
د کندهار ښار د دویمې ناحیې اوسېدونکی احمدشاه وايي چې د اوړي په سخته ګرمۍ کې د برېښنا پرچاوۍ او لوړ لګښت یې کورنۍ له جدي ننګونو سره مخ کړې ده.
نوموړی وايي: «له دې مخکې مو د کور د برېښنا لګښت شاوخوا درې تر څلورو زرو افغانۍ راته، خو په وروستي بېل کې د برېښنا له پرچاوۍ سربېره ۹ زره او ۸۰۰ افغانۍ محاسبه شوي دي.»
احمدشاه زیاتوي چې طالبان هره ورځ پر بېلابېلو برخو مالیې لګوي.
نوموړي او د کندهار ځينو نورو اوسېدونکو له طالبانو غوښتي چې په اوسني سختو اقتصادي شرایطو کې دې د برېښنا لګښت نه لوړوي.
د کندهار برېښنا د هلمند د کجکي له بنده برابرېږي او د طالبانو سیمه ییزو چارواکو هم په ځینو مواردو کې د برېښنا پرې کېدل تایید کړي دي.
