۸صبح، کابل: په ملګرو ملتونو کې د افغانستان د استازولۍ سرپرست نصیراحمد فایق وايي چې افغانان دې د پاکستاني طالبانو تحریک (ټيټيپي) اړوند د طالبانو او پاکستان د سیاستونو بیه نه پرې کوي.
فایق سهشنبه د وږي پر ۳۱مه په اېکس پاڼه کې لیکلي چې د ترهګرو ډلو یا د ترهګرۍ پر وړاندې د مبارزې په نوم ټول هغه ترهګریز اعمال او اقدامات چې د ملکیانو د مرګژوبلې لامل کېږي، په کلکه غندي.
نوموړي ویلي چې په افغانستان کې له ترهګرۍ سره دوامداره مبارزه، مشروع، مسوول او ژمن حکومت ته اړتیا لري.
فایق ټینګار کړی چې له ترهګرۍ سره مبارزه دې د نړیوالو قوانینو، نړیوالو بشردوستانه حقوقو او د افغانستان ځمکنۍ بشپړتیا ته د بشپړ درناوي پر بنسټ ترسره شي.
د نوموړي په وینا، د داسې حکومت رامنځته کول ګډ مسوولیت دی او د نړیوالې ټولنې په ملاتړ دې د افغانانو په مشرۍ او مالکیت پر مخ یووړل شي.
په ملګرو ملتونو کې د افغانستان د استازولۍ سرپرست زیاته کړې چې ملکیان دې د ترهګرۍ اړوندو سیاستونو او اقداماتو له امله نه زیانمنېږي او افغانان دې د دغو تګلارو نه قرباني کېږي.
