په ننګرهار کې د مسلکي زده کړو د مرکز جوړېدل

د مسلکي زده کړو په دغه مرکز کې به په لسو برخو کې ۲۸۰ ښځو او نارینه وو ته مسلکي زده کړې ورکول کېږي چې زیات شمېر نالوستو وګړو ته به پکې د کار زمینه برابره شي.
په همدې تړاو جوړه شوې غونډه کې د ننګرهار والي ضياءالحق امرخېل ووېل چې دغه مرکز د هند په ۱۹ اعشاريه ۷ ميليونه افغانيو جوړ شوی چې ۱۷ ميليونه افغانۍ يې په ودانۍ او ۲ اعشاريه ۷ ميليونه یې پر وسایلو لګول شوې دي.
هغه زياته کړه چې دا مرکز په دوو پوړونو کې جوړ شوی او لس تدريسي خونې، تشنابونه او اداري خونې لري او د لسو بېلابېلو کسبونو زده کړې به پکې ورکول کېږي.
د کار او ټولنيزو چارو وزير بشيراحمد ته ينج له دې امله جوړه شوې غونډه کې وویل چې د دغه مرکز په فعالېدو سره به په خیتځ زون او په ځانګړي ډول ننګرهار کې د وزګارۍ کچه راټيټه شي.
په ورته وخت کې د کار او ټولنيزو چارو وزارت له خوا د څه باندې یو نیم میلیون افغانیو په مالي لګښت د ماشومانو د ملاتړ يو مرکز هم تر بیارغونې وروسته ګټې اخیستو ته وسپارل شو.
د ننګرهار والي ددغه روزنتون په دې اړه وايي چې په دغه مرکز کې به د کمې مودې لپاره له نورو هېوادونو ایستل شوي، له خطر سره مخ، نادرکه او نور بېوزله ماشومان ساتل کېږي.
د کار او ټولنیزو چارو وزیر بشير احمد ته ينج ډاډ ورکړ چې د کار او ټولنیزو چارو روزنتون به د لېسې تر کچې لوړ کړي، په شینوارو او روداتو ولسوالیو کې به هم روزنتونونه فعال کړي او د نجونو لپاره به د ځانګړي مرکز د جوړولو هڅه وکړي.