۸صبح، کابل: په ملګرو ملتونو کې د افغانستان د دایمي استازولۍ سرپرست، نصیر احمد فایق، وايي چې په هېواد کې د سیاسي حللارې لپاره د اړینو زمینو د برابرولو په موخه د ملګرو ملتونو د مرستندوی پلاوي د دفتر (یوناما) سیاسی رول خورا اړین دی.
فایق پنجشنبه د وږي پر ۲۶مه، د ملګرو ملتونو د امنیت شورا په غونډه کې د خپلې اعلامیې په خپرولو سره ویلي چې د یوناما د ماموریت د غځېدو هرکلی کوي او د دې ادارې پر ماموریت د سټراتېژیکې بیاکتنې په تمه دی.
نوموړي زیاته کړې چې د یوناما بشري او د بشري حقونو برخې خورا مهمې دي، خو د دې مسوولې ادارې سیاسي رول هم ترې کم نه دی او همدومره اړین دی.
فایق له امنیت شورا او نړیوالې ټولنې غوښتي دي چې د افغانستان پر وړاندې یوه منسجمه او همغږې نړیواله تګلاره خپله کړي.
نوموړي د ښځو او نجونو له حقونو او مانادار ګډونه ملاتړ او همداراز د افغانانو په مشرۍ د یوه ریښتیني سیاسي بهیر ننګه د نړیوالې ټولنې له مهمو لومړیتوبونو بللې ده.
د فایق په وینا، ترهګرۍ، بشري حقونو او حساب ورکولو ته دوامداره پاملرنه، د بشري مرستو دوام او له زیانمنو خلکو ملاتړ باید په لومړي سر کې ځای ولري.
فایق ویلي دي چې افغانان له نړیوالې ټولنې دا نه غواړي چې د دوی لپاره مشران وټاکي، بلکې د خپل راتلونکي د ټاکلو حق غواړي.
