۸صبح، کندهار: سیمهییزې سرچینې وايي چې د طالبانو مشر هبتالله اخوندزاده په کندهار ښار کې د ۳۸ میلیاردو افغانیو په لګښت یو جامع جومات، یوه دیني مدرسه او یوه ودانۍ جوړوي.
سرچینو چهارشنبه د تلې پر ۲۹مه ۸صبح ورځپاڼې ته وویل چې هبتالله د دغې طرحې د عملي کولو او چمتو کولو لپاره د کابل ښاروالۍ انجنیران کندهار ته ورغوښتي.
د سرچینو په خبره، هبتالله دا پروژه د نقشې له بشپړېدو وروسته، تایید کړې ده.
سرچینې زیاتوي چې دا پروژه د کندهار ښار په «زړې فرقې» سیمه کې پر ۶۷۵ جریبه ځمکه عملي کېږي.
د سرچینو په خبره، جامع جومات پر اته جریبه ځمکه او درېیو پوړونو کې جوړېږي چې په یو وخت کې به د ۲۵ زرو لمونځ کوونکو ظرفیت ولري.
دا په داسې حال کې ده چې په افغانستان کې میلیونونه وګړي سرپناه، خوراکي توکو او پاکو اوبو ته محدود لاسرسی لري.
د ملګرو ملتونو د بشردوستانه مرستو د همغږۍ دفتر (اوچا) ویلي چې په افغانستان کې نږدې ۱۶ میلیونه کسان د خوړو له ناامنۍ سره مخ دي.
اوچا زیاته کړې چې د ژمي په نږدې کېدو سره ښايي په افغانستان کې د لوږې له خطر سره د مخامخ کسانو شمېر تر ۱۹ میلیونو ورسېږي.
