۸صبح، کابل: په ملګرو ملتونو کې د افغانستان د دایمي استازولۍ سرپرست نصیراحمد فایق وايي چې له ښوونیز نصابه د بهرنیو ژبو او مدني زدهکړو د مضمونونو حذف او د دیني مدرسو پراختیا د افغان ځوانانو ښوونیزه راتلونکې له ننګونې سره مخ کړې ده.
فایق سهشنبه د لړم پر ۱۲مه ویلي چې د دیني مدرسو د شمېر ډېروالی او د عمومي زدهکړو نظام پر ځای یې ځای پر ځای کېدل، په افغانستان کې د ښوونې او روزنې د وضعیت په اړه اندېښنې راپارولې دي.
نوموړي زیاته کړې چې د ۲۰۲۵ کال تر سپټمبر پورې څه باندې ۲۳ زره دیني بنسټونه ثبت شوي، بڼه یې بدله شوې یا نوي جوړې شوې دي.
په ملګرو ملتونو کې د افغانستان د دایمي استازولۍ سرپرست ویلي چې د مصنوعي ځیرکتیا د پراختیا او د ښوونې او روزنې او کاري بازار د بدلونونو په پام کې نیولو، د هېواد ځوانان علمي پوهې، ډیجیټلي مهارتونو او انتقادي تفکر ته اړتیا لري.
د فایق په خبره، افغان ځوانان دې د زدهکړو او په بدلېدونکې نړۍ کې د ګډون فرصت ولري، څو په راتلونکې کې اغېزناک رول ولوبولی شي.
نوموړي شته ننګونو ته په اشارې ویلي چې افغان ځوانان له محدودیتونو سره سره لا هم د زدهکړو، کار او ټولنې ته د خدمت لپاره هڅې کوي او د دغو هڅو ملاتړ دې یې وشي.
فایق ټینګار کړی چې نړیوال تعاملات دې د نجونو او هلکانو لپاره د زدهکړو او کار د مساوي فرصتونو ملاتړ وکړي او د هغو تګلارو له عادي کولو دې ډډه وشي چې یو نسل له پرمختګه بېبرخې کوي.
