۸صبح، کابل: په ملګرو ملتونو د افغانستان د دایمي استازولۍ سرپرست نصیراحمد فایق ویلي چې طبیعي سرچینې او د کانونو ګټې دې د خلکو په چوپړ کې وي او مدیریت دې یې د روڼتیا، حساب کتاب او ملي ګټو له مخې وشي.
فایق پنجشنبه د چنګاښ پر ۱۸مه په خپله اېکس پاڼه کې لیکلي، اصلي پوښتنه دا ده چې د دغې ملي شتمنۍ عاید چېرته لګول کېږي او ایا د افغانستان د کانونو په عوایدو کې روڼتیا، حساب کتاب او خپلواکه څارنه شته که نه.
نوموړي ویلي، که څه هم افغانستان د نړیوالې ټولنې له بشردوستانه مرستو سره تړلی، د ښځو، ځوانانو او معلولیت لرونکو کسانو په ګډون میلیونونه هېوادوال له بېوزلۍ، بېکارۍ او ناهیلۍ سره مخ دي.
فایق زیاته کړې چې ډېر وګړي د شته وضعیت له کبله کډوالۍ ته اړ شوي او هممهاله د وسلهوالو غلاوو، اختطاف او مرموزو وژنو په ګډون د جنايي جرمونو کچه لوړه شوې ده.
هغه ټينګار کړی چې د افغانستان طبیعي سرچینې د ټولو افغانانو اړوند دي او داسې دې مدیریت شي چې ملي ګټې خوندي شي، نه ډله ییزې او شخصي.
