۸صبح، کابل: د ملګرو ملتونو د خوړو او کرنې سازمان (فایو) اعلان کړی چې په افغانستان کې د غنمو د کرکېلې د کڅوړو وېشلو د کروندګرو حاصلات ۳۲.۸ سلنه زیات کړي دي.
دغه بنسټ پنجشنبه د تلې پر ۹مه، ویلي چې د اسیايي پراختیایي بانک، اروپایي ټولنې، د جاپان او بریتانیا حکومتونو او د نړیوال بانک په مالي ملاتړ یې په افغانستان کې د غنمو د کرکېلې ۱۶۸ زره و ۲۰۸ کڅوړې وېشلې دي.
دغه بنسټ زیاته کړې چې په هره کڅوړه کې اصلاح شوي تخمونه، سرې او عملي کرنیزې روزنې شاملې وې.
د فایو په وینا، د غنمو دا کڅوړې د ۲۰۲۵ او ۲۰۲۶ کلونو ترمنځ په کرنیز فصل کې وېشل شوې دي.
د فایو په وینا ارزونه ښیي هغه کروندګر چې دا کڅوړې یې ترلاسه کړې، د هغو کروندګرو پرتله چې دا ملاتړ یې نه دی ترلاسه کړی، ۳۲.۸ سلنه زیات حاصلات ترلاسه کړي دي.
دغه بنسټ زیاته کړې، چې د یوې داسې کورنۍ لپاره چې په دوو جریبو ځمکه کې غنم کري، دغه زیاتوالی شاوخوا ۰.۳۶ ټنه اضافي غنم کېږي؛ دا اندازه کولای شي د کورنۍ د دوو نورو غړو د یوه کال د غنمو اړتیا پوره کړي.
فایو همدا راز ویلي د هغو کروندګرو ترمنځ چې دا کڅوړې یې ترلاسه کړې، د بوسو حاصلات ۶.۳ سلنه زیات شوي؛ هغه بوس چې په کلیوالو کورنیو کې د څارویو د خوړو په توګه کارول کېږي.
