۸صبح، کندهار: په کندهار کې سیمهییزي سرچینې وايي چې طالبانو د دغه ولایت په پنځو سیمو، سپینبولدک، تختهپل، ډنډ، پنجوايي او میوند ولسوالیو کې د ریګونو تفریحي سیمو ته د خلکو پر تګ بندیز لګولی دی.
سرچینو یکشنبه د تلې پر ۲۶مه له ۸صبح ورځپاڼې سره په خبرو کې ویلي چې طالبانو خپلو جنګیالیو ته امر کړی چې دغو تفریحي سیمو ته د خلکو د تګ مخه ونیسي.
د سرچینو په خبره، دا پرېکړه د ژمي د موسم په رانږدې کېدو شوې، ځکه په دې موسم کې دغو سیمو ته د تفریح لپاره د خلکو ورتګ زیاتېږي.
ورته مهال په کندهار کې د طالبانو د اطلاعاتو او کلتور ریاست ویلي چې دا سیمې د جنایي پېښو او نښتو د رامنځته کېدو له امله تړل شوې دي.
د طالبانو دغې پرېکړې په ټولنیزو رسنیو کې نیوکې راپارولې دي.
ځينو کاروونکو ویلي چې دا ډله هغه فعالیتونه محدودوي چې خلکو ته د خوشحالۍ او تفریح وسیله ګرځي.
ویل کېږي چې دغو سیمو ته به د رخصتیو په ورځو کې زرګونه کسان ورتلل.
