۸صبح، بدخشان: په بدخشان کې ځايي سرچینې وايي چې دوه ورځې مخکې د قره کمر – فیض اباد پر لاره د ملي امنیت پر یوه پخواني کارکوونکي ډزې شوې او پرون یې په روغتون کې ساه ورکړې ده.
سرچینو چهارشنبه د چنګاښ پر ۱۰مه ۸صبح ورځپاڼې ته وویل چې د ملي امنیت دا پخوانی کارکوونکی عبدالجمیل جویا نومېده او د بدخشان د ملي امنیت ریاست د ښاري امنیت مرستیال و.
د معلوماتو له مخې، نوموړی داسې مهال په ډزو لګېدلی چې د حاجیانو له یوه کاروان سره روان و.
ویل کېږي چې عبدالجمیل جویا په مرمۍ له لګېدو وروسته ټپي او د درملنې لپاره د کندوز حوزوي روغتون ته وړل شوی، خو پرون یې د ټپونو له کبله ساه ورکړې ده.
د سرچینو په وینا، نوموړي د بدخشان د شهر بزرګ امنیت په مدیریت او په بدخشان کې د ملي امنیت ریاست په بستونو کې کار کړی، ولسي مشر و او په انګلیسي، اردو او عربي ژبو پوهېده.
ځينو سرچینو ادعا کړې چې ښايي نوموړی طالبانو وژلی وي.
له دې وړاندې هم د هېواد په نورو ولایتونو کې د مخکېني حکومت نظامیان وژل شوي دي.
