۸صبح، کابل: جرمني ۳۱ افغانان په یو چارتر الوتنه کې افغانستان ته ستانه کړي دي.
د جرمني رسنیو سهشنبه د زمري پر ۶مه راپور ورکړی چې دا کسان تېره شپه د جرمني له لایپزیک هوايي ډګره افغانستان ته لېږل شوي دي.
د راپورونو له مخې، د دغه هېواد چارواکو ویلي چې ډېر ایستل شوي کسان پر جرمونو محکوم وو.
د جرمني د کورنیو چارو وزیر ویلي چې ایستل شويو کسانو په درنو جرمونو لکه وژنې، جنسي تېري او تاوتریخوالي کې لاس درلود.
نوموړي زیاته کړې چې په دې الوتنه کې یو کس پر جرم محکوم نه و خو د هغه په خبره، دا کس هم له جرمني څخه پر وتلو مکلف و.
ویل کېږي چې تر اوسه مرکزي دولت او ایالتونو پر درنو جرمونو د تورنو پر ایستلو تمرکز درلود، خو دا بهیر به له دې وروسته پراخ شي.
د راپور له مخې، هغه کسان چې له جرمني څخه د وتلو مکلفیت لري، خو د ادغام په بهیر کې یې همکاري نه ده کړې، له ټولنیزو مرستو څخه ګټه اخلي، یا د خپل هویت د روښانه کولو په برخه کې همکاري نه کوي، ښايي د ایستلو په بهیر کې شامل شي.
له دې مخکې د اروپا د پارلمان غړې هانا نیومن خبرداری ورکړی و چې له اروپا څخه افغانستان ته د افغانانو بېرته ستنول به جدي پایلې ولري.
