غني: پاکسـتان لـه دې وروسـته د نړیوالو ځواکونو د حضور پـر سـر لـه امـریکا د بـاج اخیستو فرصت نه لري

د هېواد ولسمشر محمد اشرف غني په راتلونکو څو اونیو کې له پاکستان سره د جدي مذاکراتو د پيلولو خبر ورکړی دی.
نوموړي له پاکستان سره د خبرو په اړه نور جزییات نه دي ورکړي، خو د افغان مېرمنو شبکې له غړو سره په کتنه کې یې ویلي چې پاکستان له دې وروسته په افغانستان کې د نړیوالو ځواکونو د حضور پر سر له امریکا د باج اخیستو فرصت نه لري.
ولسمشر یو ځل بیا ټینګار کړی چې پاکستان باید له افغانستان سره د دوستۍ او دښمنۍ ترمنځ یو انتخاب کړي. محمد اشرف غني په تېرو وختونو کې هم دا خبره کړې وه.
ولسمشرۍ دفتر ویلي چې ښاغلي غني د افغان مېرمنو د شبکې له غړو سره له افغانستانه د بهرنیو ځواکونو له وتلو وروسته نوي فصل، سولې بهیر او د ښځو د غوښتنو او حقونو په اړه خبرې کړې دي.
په دغه کتنه کې د ولسمشر مېرمنې هم ویلي چې نن افغان ښځې خپل غږ پورته کوي او هېڅوک د دوی پر حقونو معامله نه شي کولی.
ولسمشر غني د خپلو خبرو په یوه برخه کې ویلي چې د افغانستان اساسي قانون هغه ته اجازه نه ورکوي چې د ښځو پر حقونو معامله وکړي او د سولې په بهیر کې د ښځو ونډه یقیني شوې ده.
د هغه په وینا، د سولې بهیر له شکونو وتلی او هره پرېکړه د افغانانو د ارادې پر بنسټ کېږي.
هغه زیاته کړې: «د نړیوالو ځواکونو وتل، د افغانستان ملي واکمني پياوړې کوي، د سیمې روایت د بدلون په حال کې دی؛ له نړیوالو همکارانو سره نوی باب پيلېږي او د بل هر وخت په پرتله د سولې لپاره ښه فرصت برابر شوی دی.»
محمد اشرف غنی جوته کړې چې د سولې په هکله اصلي تصمیم د ننه په افغانستان کې نیول کېږي او وروستۍ پرېکړه افغان اولس کوي.
د هغه په وینا، له دې وروسته اصلي اړخ افغان حکومت دی او د سولې په اړه هېڅ ناسته کې به د مېلمه په توګه نه بلکې د اصلي خاوند په بڼه ګډون کوي.
په دغه کتنه کې، د افغان مېرمنو د شبکې غړو د سولې بهیر په پریکړو، د جمهوریت د خوندیتوب، د معلوماتي تشې د له منځه وړلو او لویو ملي پروژو د کار د دوام په اړه پرېکړو کې د ښځو پر ونډې ټینګار کړی دی.