۸صبح، کابل: اروپايي ټولنې د افغانستان په سویل او سویللویدیځ کې څه باندې ۳۴۷ زرو کسانو ته د روغتیايي خدماتو، تغذیې او اوبو رسولو لپاره ۱۲ میلیونه یورو ځانګړې کړې دي.
دا مرسته د «انټرسوس» نړیوال سازمان له لارې، د نړیوال پیوستون ادارې او د نړۍ د ډاکټرانو سازمان په همکارۍ لګول کېږي.
دا پروګرام د ۲۰۲۶ کال د جون له لومړۍ د ۲۰۲۷ کال د مې تر ۳۱مې پورې د کندهار، زابل، روزګان، هلمند، فراه او نیمروز په ۲۸ سیمو کې پلی کېږي.
تمه کېږي چې دا پروژه به په غیرمستقیم ډول نږدې ۱.۲۷ میلیونه نورو کسانو ته هم ګټه ورسوي.
دغه راز، ۳۹ زره او ۱۷۵ کسان به د ناروغیو د خپرېدو، د اقلیمي بدلونونو له امله د رامنځته شویو پېښو او بېځایه کېدو په غبرګون کې د بېړنیو مرستو تر پوښښ لاندې راشي.
دا په داسې حال کې ده چې اروپايي ټولنه وايي، په ۲۰۲۶ کال کې په افغانستان کې شاوخوا ۲۱.۹ میلیونه کسان بشري مرستو ته اړتیا لري.
له پنځو کالو کم عمره ماشومان، امیندواره او شیدې ورکوونکې مېندې، معلولیت لرونکي وګړي او په لرې پرتو او محرومو سیمو کې مېشتې کورنۍ هغه ډلې دي چې بنسټيزو خدماتو ته د لاسرسي له جدي ستونزو سره مخ دي.
اروپايي ټولنې ویلي چې دا مرسته د افغانستان په محرومو سیمو کې زیانمنونکو کسانو ته د بنسټيزو او ژوند ژغورونکو خدماتو د وړاندې کولو په موخه کېږي.
دا پروګرام د هغو ناروغیو او مړینو د مخنیوي لپاره پلي کېږي چې مخنیوی یې شوی دی.
