د ملګرو ملتونو سرمنشي انتونیو ګوتېرېش ویلي چې سوله یوازې د جګړې نشتوالی نه دی او د قانون پر حاکمیت، د ملکي وګړو خوندېتوب او د خلکو حقونو ته پر درناوي یې ټينګار کړی دی.
ګوتېرېش سهشنبه د سپټمبر ۲۲مه، ویلي چې په ټوله نړۍ کې د نښتو د زیاتېدو په ترڅ کې د ملګرو ملتونو د عمومي اسمبلې پر مهال د نړۍ مشرانو ته پیغام دا دی چې د دغه بنسټ له منشور څخه له دوهګوني چلند پرته ملاتړ وکړي.
نوموړي ټینګار کړی چې زور دې د خلکو د ژوند، حقونو او راتلونکي په اړه وروستۍ پرېکړه کوونکې وسیله ونه ګرځي.
د ملګرو ملتونو سرمنشي د نړۍ له مشرانو غوښتي چې له هېڅ ډول استثنا پرته د ملکي وګړو ساتنه وکړي او اړمنو ته د بشري مرستو د رسېدو بېخنډه لاسرسی ډاډمن کړي.
ګوتېرېش همداراز د بشرپالو کارکوونکو پر خوندیتوب او د اټومي وسلو د خپرېدو د مخنیوي او د بېوسلې کولو بهیر د پلې کېدو لپاره یې د هڅو پر دوام ټینګار کړی دی.
هغه ویلي چې له قوانینو د هر ډول سرغړونې په وړاندې دې له وېرې او پلویتوب پرته د حساب کتاب غوښتنه وشي.
