۸صبح، کابل: د روغتیا نړیوال سازمان خبر ورکړی چې د ایټالیا په مالي ملاتړ په لغمان او ننګرهار کې زرګونو کورنیو لومړنیو او اړینو روغتیايي خدماتو ته لاسرسی موندلی دی.
نوموړي سازمان سهشنبه د وږي پر ۳۱مه راپور ورکړی چې د ۲۰۲۶ کال تر سپټمبره، د راستنېدونکو په ګډون ۶۸ زره او ۲۶۳ کسان روغتیايي خدماتو ته له لاسرسي برخمن شوي دي.
د راپور له مخې، په وړاندې شویو روغتیايي خدماتو کې د میندو او ماشومانو روغتیايي پاملرنه، واکسیناسیون، د خوارځواکۍ معاینه او رواني روغتیايي خدمات شامل و.
ملګرو ملتونو ویلي، دا پروګرام په ځانګړې توګه هغو کورنیو ته ارزښت لري چې د اوږدې لارې، د تګ راتګ د لګښتونو او د ستونزمنو لارو له امله روغتیايي مرکزونو ته په لاسرسي کې له خنډ سره مخ دي.
د روغتیا نړیوال سازمان زیاته کړې چې د ایټالیا مالي ملاتړ په دغو دوو ولایتونو کې زیانمنو ټولنو ته د لومړنیو روغتیايي خدماتو په برابرولو کې مرسته کړې ده.
