۸صبح، کابل: د روغتیا نړیوال سازمان (WHO) ویلي چې د ایټالیا په مالي ملاتړ په افغانستان کې له اوو روغتیايي مرکزونو ملاتړ کوي څو اړمنو او راستنېدونکو ته اړین روغتیايي خدمات وړاندې کړي.
نوموړي بنسټ سهشنبه د وږي پر ۳۱مه راپور ورکړی چې په هغو سیمو کې له اوو روغتیايي مرکزونو تخنیکي او عملیاتي ملاتړ کوي چې روغتیايي خدماتو ته یې د اوسېدونکو لاسرسی له ننګونو سره مخ دی.
په افغانستان کې د روغتیا نړیوال سازمان استازي ادوین سینیزا سلوادور ویلي چې له لویو ښارونو څخه په لرې سیمو کې روغتیايي خدماتو ته د خلکو پر وخت لاسرسی، د اوسېدو ځای ته یې نږدې د اړینو روغتیايي خدماتو له شتون سره تړاو لري.
نوموړي زیاته کړې چې ملګري ملتونه د ایټالیا په ملاتړ له روغتیايي مرکزونو سره مرسته کوي څو د راستنېدونکو په ګډون اړمنو ته روغتیايي خدمات وړاندې کړي.
د روغتیا نړیوال سازمان د ایټالیا د ملاتړ له دوامه مننه کړې ده.
