۸صبح، کابل: د اروپايي پارلمان غړې هانا نیومن ویلي چې له طالبانو سره د اروپايي ټولنې تعامل، د حساب ورکولو له ډاډ پرته، له دې ډلې سره د اړیکو د عادي کېدو اندېښنې راپارولې دي.
نیومن سهشنبه د چنګاښ پر ۲۳مه په اېکس کې لیکلي چې څومره هم د طالبانو له ګومارل شويو استازو سره د تعامل معلومات خپرېږي، هومره د دغه بهیر په اړه پوښتنې راپورته کېږي.
نوموړې زیاته کړې چې اروپايي ټولنې ویلي، دا خبرې یوازې د هغو کسانو د بېرته ستنولو په اړه دي چې پر درنو جرمونو محکوم شوي، خو روان پرمختګونه ښيي چې ښايي دا بهیر نور هم پراخ شي.
نیومن، هغو راپورونو ته په اشارې چې ګواکې جرمني د هغو افغانانو د ایستلو لپاره چمتووالی نیسي چې جنايي محکومیت نه لري، ویلي: «نو ایا اروپايي کمېسیون اوس په ټوله اروپا کې طالب چارواکو ته د افغانستان کونسلي خدماتو د سپارلو زمینه برابروي؟»
هغې ټینګار کړی چې له طالبانو سره تعامل دې له حساب ورکولو پرته پر سیاسي عادي کولو نه اوړي.
نوموړې له اروپايي ټولنې غوښتي چې د کډوالو د بېرته ستنولو بهیر، په اروپا کې د مېشتو افغانانو د خوندیتوب او د دغې همکارۍ په بدل کې د طالبانو د غوښتنو په اړه سپیناوی ورکړي.
