۸صبح، کاپيسا: په کاپیسا کې ځینې ډاکتران وايي چې د «BDN» په نوم موسسې یې له څلورو میاشتو راهیسې معاش ورکړی نه دی.
هغوی چهارشنبه د لړم پر ۹مه ۸صبح ورځپاڼې ته وویل چې دا مهال په کاپیسا کې ډېری روغتیايي کارکوونکي له ګڼو اقتصادي ننګونو سره مخ دي.
په کاپیسا کې د عامې روغتیا ریاست یو کارکوونکی ۸صبح ورځپاڼې ته وايي: «پرون په کور کې هېڅ نه و. وچ جوار مو جوش کړل او ماشومانو ته مې ورکړل. دوکانونه هم نور پور نه ورکوي، په داسې حال کې چې پرسونل شپه او ورځ د ناروغانو او مراجعینو خدمت کوي.»
ورته مهال، سرچینې زیاتوي چې له دې وړاندې په کاپيسا کې د روغتیايي کارکوونکو معاشونه د «OHPM» په نوم موسسې ورکول؛ خو له څو میاشتو راهیسې یې د باختر پراختیايي شبکه «BDN» ورکوي.
د سرچینو په خبره، سره له دې چې دغې شبکې په وخت د روغتیايي کارکوونکو معاشونه نه دي ورکړي؛ د نرسانو او ډاکترانو معاشونه یې هم له ۱۰۰ تر ۳۰۰ ډالرو کم کړي.
د یادونې ده چې د طالبانو له واکمنېدو او نړیوالو مرستو له کمېدو وروسته په افغانستان کې روغتیايي نظام له ګڼو ننګونو سره لاس او ګریوان دی.
له دې مخکې د پروان ولایتي روغتون ځینو ډاکترانو ویلي چې د «کف» په نوم یوې موسسې شاوخوا ۴۰ سلنه معاشونه وړي دي.
