۸صبح، کاپیسا: په کاپيسا کې طالب سيمهييز چارواکي وايي چې په دغه ولايت کې د هاوان مرمۍ چاودنې يو ۹ کلن ماشوم مړ او درې نور یې ټپيان کړي دي.
دا پېښه پنجشنبه د غبرکولي پر ۱۷مه د محمود راقي ښار د دويمې امنيتي حوزې اړوند د «قلعه سرکاري نواباد» په کلي کې رامنځته شوې ده.
د کاپیسا ولایت د طالبانو امنیه قومندانۍ په یوې خپره کړې خبرپاڼه کې ویلي چې د دې پېښې ټول قربانیان د یوې کورنۍ غړي دي.
تېر کال د تلې پر ۲۹مه هم د کاپيسا په الهساى ولسوالۍ کې د ماين چاودنې يو ماشوم مړ او يو بل يې ټپي کړ.
څو میاشتې وړاندې په افغانستان کې د ملګرو ملتونو مرستندویه پلاوي (یوناما) ویلي و چې په هېواد کې د تېرو څو لسیزو جګړو پاتې ناچاوده ماینونو په چاودنو کې نږدې ۴۵ زره کسانو ته مرګژوبله اوښتې ده.
دغه بنسټ ویلي چې لا هم ماینونه او ناچاوده توکي د افغانانو په ځانګړي ډول د ماشومانو ژوند ګواښي.
