۸صبح، کابل: د هرات ځينو اوسېدونکو د یلدا شپې په مناسبت ویلي چې که څه هم طالبانو پر ګڼو کلتوري مناسبتونو بندیز لګولی، د یلدا شپې نمانځنه د خوشحالۍ او پیوستون لپاره یوه پلمه ده.
سرچینو یکشنبه د لیندۍ پر ۳۰مه ۸صبح ورځپاڼې ته ویلي چې د یلدا شپې نمانځنه د چوپتیا او تیارې پر وړاندې د مقاومت په مانا ده.
د سرچینو په خبره، په اوسنیو سختو شرایطو کې د داسې مناسبتونو نمانځنه د هیلې او ټولنیز یووالي د ژوندي ساتلو لپاره د خلکو هڅه ده.
هغوی زیاته کړې چې د لرغونو او کلتوري دودونو خوندیتوب د دې لامل کېږي چې د ټولنې کلتوري هویت اغېزمن نه شي او ځوان نسل د هېواد له لرغونو او تاریخي ارزښتونو سره بلد پاتې شي.
د هرات اوسېدونکو ټينګار کړی چې یلدا شپه یوازې یو دودیز مناسبت نه دی، بلکې پر تیارې د رڼا او پر ناهیلۍ د هیلې د بریا سیمبول ده.
هغوی وايي چې په تېرو څلورو کالو کې د افغانستان اوسېدونکي له خوشحالۍ لرې پاتې شوې او د کلتوري مناسبتونو د نمانځلو له لارې د خوشحاله ژوند او رواني فشارونو د کمولو په لټه دي.
د هغوی په باور، که څه هم محدودیتونه پراخ شوې، خو خلک د کلتوري دودونو د خوندي کولو له لارې هڅه کوي چې د ژوند چاپېریال له ناهیلۍ او چوپتیا لرې وساتي.
