د امریکا د ولسمشر ډونالډ ټرمپ ویلي چې پر ایران اقتصادي فشار دوه برابره کوي.
الجزیرې شنبه د مې پر ۲مه، راپور ورکړی چې امریکا به پر هغو کسانو او بنسټونو بندیزونه ولګوي چې د هرمز تنګي پر لاره ایران ته «حق العبور» ورکوي.
ټرمپ دغه راز ټینګار کړی چې پر ایران د مالي فشار لپاره د هغه تګلاره اغېزناکه ده.
هغه ادعا کړې چې د هرمز تنګي کلابندي ایرانیانو ته میلیونونه ډالر لګښت اړوي.
هغه دغه راز ویلي چې په ایران کې پر اشخاصو او بنسټونو روان بندیزونه د اقتصادي اغېز د رامنځته کولو په حال کې دي.
د هغه په باور، دا فشارونه به بالاخره ایران اړ کړي چې د ده د شرایطو پر بنسټ د یوې هوکړې لپاره د خبرو مېز ته حاضر شي.
د امریکا د خزانې وزارت اعلان کړی چې پر هغو بنسټونو او اشخاصو به بندیزونه ولګوي چې د تنګي د تېرېدو په بدل کې ایران ته پیسې ورکوي.
تر دې وړاندې د ایران ولسمشر مسعود پزشکیان په هرمز تنګي کې د امریکا سمندري کلابندي «ظالمانه» بللې وه.
