د رویترز خبري اژانس د امریکايي چارواکو له قوله راپور ورکړی چې ایران له واشنګټن سره د کړکېچ د حل لپاره د یوه ليکلي وړاندیز وړاندې کولو ته چمتووالی نیسي.
دې رسنۍ پنجشنبه، د فبرورۍ پر ۱۹مه، د یوه لوړپوړي امریکايي چارواکي له قوله لیکلي چې ایران د جنیوا په مذاکراتو کې هوکړه کړې چې د امریکا د اندېښنو د لېرې کولو د څرنګوالي په اړه به یو ليکلی وړاندیز وړاندې کړي.
هغه ویلي چې امریکا دا مهال د ایران د لیکلي وړاندیز په تمه ده.
د راپور له مخې، د امریکا د ملي امنیت سلاکارانو د چهارشنبې په ورځ د سپینې ماڼۍ د وضعیت په خونه کې د ایران په تړاو غونډه کړې او هغوی ته ویل شوي چې په سیمه کې مېشت ټول امریکايي پوځي ځواکونه باید د مارچ تر نیمایي پورې په خپلو ځایونو کې پاتې شي.
متحده ايالتونه غواړي ایران خپل اټومي پروګرام پرېږدي، خو ایران دا غوښتنه په کلکه رد کړې او ټینګار یې کړی چې د اټومي وسلو د جوړولو نیت نه لري.
د راپور پر بنسټ، امریکا هڅه کړې چې د خبرو اترو لمنه له اټومي موضوعاتو هاخوا وغځوي او د ایران د توغندیزو زېرمو په څېر غیر اټومي مسایل هم پکې شامل کړي؛ خو ایران وایي یوازې چمتو دی د بندیزونو د لېرې کولو په بدل کې د خپل اټومي پروګرام د محدودولو په تړاو خبرې وکړي.
په همدې حال کې، ځینو امریکايي رسنیو د اوونۍ په پای کې پر ایران د امریکا د احتمالي برید خبر هم ورکړی دی.
