۸صبح، کابل: د بشري حقونو د فعالانو ټولنې په هرات کې د ښځو د نیونو د دوام په غبرګون کې له ملګرو ملتونو، ځانګړو راپور ورکوونکو او د بشري حقونو له بنسټونو غوښتي چې د طالبانو د حساب ورکونې لپاره بېړني او اغېزناک اقدامات وکړي.
دې ټولنې پنجشنبه د زمري پر ۸مه، په یوه خبرپاڼه کې د طالبانو له لوري د ښځو خپلسري نیونې او پر هغوی لګېدلي محدودیتونه ناقانونه او د بشري حقونو، نړیوالو قوانینو او انساني کرامت خلاف بللي دي.
په خبرپاڼه کې ویل شوي چې نړیوال بنسټونه باید د لا ډېری بېعدالتۍ او د بشري ناورینونو د تکرار د مخنیوي لپاره عملي او اغېزناک اقدامات وکړي.
د بشري حقونو د فعالانو ټولنې ټینګار کړی چې اوس په هرات کې روان وضعیت یوازې د ښځو د حجاب په محدودیتونو پورې نه محدودېږي، بلکې د ښځو د ټولنیز ژوند د کنټرول، سپکاوي او له ټولنې د ایستلو د یوې منظمې تګلارې برخه ده.
دې ټولنې خبرداری ورکړی چې دا ډول چلند د افغانستان په تاریخ کې د ځپنې او ژورې ریښې لرونکي ظلم پخوانۍ دورې را برسېره کوي؛ هغه دورې چې د ښځو کرامت، اختیار او حقونه د استبداد او وسلهوالې واکمنۍ قرباني شوي وو.
دغه بنسټ ویلي چې هېڅ ټولنه د ښځو په زنداني کولو، د نجونو په چوپولو او په کورنیو کې د وېرې په خپرولو سره ثبات، عدالت او مشروعیت ته نه شي رسېدای.
