۸صبح، کابل: د ملګرو ملتونو د بشري چارو د همغږۍ دفتر (اوچا) ويلي چې د نورستان ولايت د مرکز پارون ښار د ناڅاپي سېلابونو له امله ۲۳ کسان مړه او ۱۵ نور ټپيان شوي دي.
اوچا سه شنبه د چنګاښ پر ۳۰مه، په خپل راپور کې ويلي چې سېلابونو د استوګنې کورونو، بازارونو، سړکونو، پلونو، د اوبو رسولو شبکو او کرنيزو ځمکو ته درانه زيانونه اړولي دي.
اوچا زياته کړې چې لږ تر لږه ۲۲ کورونه په بشپړ ډول ويجاړ شوي او شاوخوا ۴۵ کورونه، پنځه بازارونه، نږدې ۷۰ دوکانونه، څلور پلونه، د سړک شپږ برخې، ۴۰۰ متره استنادي دېوال او د اوبو لګولو ۴۵۰ متره کانالونه زيانمن شوي دي.
د اوچا په وينا، ۲۵ موټر، دوه د ترکاڼۍ کارغالي او د ارې ماشينونه، يو جومات او يو شخصي کلينيک هم زيانمن يا ويجاړ شوي دي.
دغه بنسټ زياته کړې چې په ننګرهار ولايت کې د تورخم د کډوالو د لېږد په يوه مرکز کې سېلابونو درې افغان کډوال مړه او نهه نور ټپيان کړي دي.
د راپور له مخې، سېلابونو دپه تورخم کې تګ راتګ هم د لنډ وخت لپاره ګډوډ کړی او دوکانونو او د خلکو د ژوندانه اړوندو تاسيساتو ته يې زيان رسولی دی.
د لغمان ولايت د اليشنګ ولسوالۍ په ځينو سيمو کې هم کرنيزې ځمکې او د اوبو لګولو سيستمونه زيانمن شوي دي.
