د امریکا ولسمشر ډونالډ ټرمپ له روسیې سره د ډیزلو تېلو د برابرولو هوکړه سمه پرېکړه بللې او ترې دفاع یې کړې ده.
ټاس خبري اژانس دوشنبه د اکتوبر پر ۱۲مه راپور ورکړی چې ټرمپ په دې اړه ویلي، د امریکایانو لپاره یې سمه پرېکړه کړې ده.
د روسیې ولسمشر ولادیمیر پوتین او ټرمپ د اکتوبر پر ۹مه په ټلیفوني خبرو کې امریکا او نړیوالو بازارونو ته د تېلو او نفتي محصولاتو پر برابرولو خبرې کړې دي.
پوتین له دغو خبرو وروسته ویلي، مسکو بیا د امریکا او نړۍ بازارونو ته د تېلو او نفتي محصولاتو د برابرولو لپاره چمتووالی تایید کړی دی.
د روسیې د لومړي وزیر مرستیال الکساندر نوواک ویلي، هېواد به یې د ډیزلو پر صادراتو لګېدلی بندیز له ټاکل شوې مودې مخکې پای ته ورسوي.
نوموړي زیاته کړې، روسیه چمتو ده چې په اکتوبر کې ۳۰۰ زره ټنه ډیزل صادر کړي او دا کچه به په نومبر کې ۵۰۰ زرو ټنو او په ډسمبر کې یو میلیون ټنو ته لوړه شي.
