ملګري ملتونه د بېوزلۍ د له منځه وړلو د نړیوالې ورځې په مناسبت وايي، چې په ټوله نړۍ کې تر ۲.۸ میلیاردو ډېر کسان په نامناسبو استوګنیزو شرایطو کې ژوند کوي.
دغه سازمان شنبه د اکټوبر پر ۱۷مه، ټینګار کړی چې بېوزله او محروم کسان د مناسب کور د نشتوالي له امله تر نورو ډېر زیانمنېږي.
سږ کال د بېوزلۍ د له منځه وړلو نړیواله ورځ د «ټولو لپاره خوندي کورونه» تر شعار لاندې نمانځل کېږي.
د دې ورځې د نمانځلو موخه د خوندي او مناسبو کورونو د برابرولو، د بشري حقونو د ساتنې او د انساني کرامت د درناوي پر اهمیت ټینګار دی.
ملګرو ملتونو دغه راز ویلي، چې د مناسبو کورونو برابرول د دوامدار پرمختګ له موخو سره تړاو لري؛ په دغو موخو کې د بېوزلۍ له منځه وړل، د نابرابریو کمول، د پاېيدونکو ښارونو او ټولنو رامنځته کول او د سولې او عدالت پیاوړتیا شامل دي.
