۸صبح، کابل: په اافغانستان کې د ملګرو ملتونو سیاسي دفتر (یوناما) د ښځو د نړیوالې ورځې په مناسبت پر افغان ښځو او نجونو د پانګونې غوښتنه کړې ده.
یوناما شنبه د کب پر ۱۸مه په یوه خبرپاڼه کې یو ځل بیا له طالبانو غوښتي چې پر ښځو او نجونو لګول شوي ټول محدودیتونه لېرې کړي.
یوناما د سږ کال شعار «حق، برابري او د ښځو ځواکمنتیا» ټاکلی او ټینګار یې کړی چې طالبانو ښځې له زدهکړو او ټولنیز ژونده محرومې کړې دي.
په افغانستان کې د یوناما مشرې روزا اوتونبایوا ویلي دي:« د ښځو د زدهکړو او کار د حقونو بېرته ورکول به د هغوی ژوند، ټولنه او د افغانستان راتلونکی د ټولو په ګټه بدل کړي»
یوناما له نړیوالې ټولنې غوښتنه کړې چې د شعارونو پر ځای عملي اقدامات وکړي او له افغان ښځو سره خپل پیوستون پیاوړی کړي.
طالبانو پر افغانستان تر واکمنېدو وروسته ښځې له بنسټیزو حقونو لکه زدهکړو، کار او فردي ازادیو محرومې کړې دي.
