۸صبح، کابل: د کډوالۍ نړیوال سازمان خبر ورکړی چې د ۲۰۲۶ کال له جنورۍ تر اکتوبره یې له پاکستانه راستنو شویو څه باندې ۱۱۰ زرو کسانو سره مرسته کړې ده.
نوموړي سازمان دوشنبه د لړم پر ۱۱مه په اېکس پاڼه کې لیکلي چې دا مرسته د اروپايي ټولنې په ملاتړ وړاندې شوې ده.
د دغه بنسټ په خبره، تېره اوونۍ د اروپايي ټولنې او کډوالۍ نړیوال سازمان استازو په کندهار کې له خدماتي مرکزونو لیدنه کړې ده.
هغوی له راستنیو شویو افغانانو سره لیدلي چې روغتیايي، حفاظتي او نور اړین خدمات یې ترلاسه کول.
د کډوالۍ نړیوال سازمان زیاته کړې چې د اروپايي ټولنې ملاتړ د دغو مرستو د وړاندې کولو لاره چاره برابره کړې ده.
