۸صبح، کابل: د طالبانو د ترانسپورت او هوايي چلند وزارت ویلي چې «ایران ایرتور» هوايي شرکت کابل ته خپلې الوتنې پېل کړې دي.
نوموړي وزارت دوشنبه د لړم پر ۷مه په خواله شبکې اېکس کې لیکلي چې یاد شرکت کابل ته خپله لومړنۍ الوتنه کړې ده.
وزارت ویلي چې ټاکلې ده نوموړی شرکت افغانستان ته د اوونۍ دوه الوتنې ولري.
د دغه وزارت د مسوولانو په خبره، د الوتنو له ډېرېدو سره به خلکو او سوداګرو ته اسانتیا برابره شي.
ورته مهال، کام ایر، اریانا افغان، ماهان او کېش هوايي شرکتونه د کابل او تهران ترمنځ دومداره الوتنې لري.
د یادونې ده چې په منځني ختیځ کې د کړکېچ له ډېرېدو وروسته د افغانستان له فضا د الوتنو کچه ډېره شوې ده.
