جاپان له افغانستان سره د دوه اعشاریه ۱۲۲ میلیون ډالرو مرسته کوي

په کابل کې د جاپان سفارت د سلواغې په دیارلسمه نېټه اعلان وکړ چې دغه هېواد د افغانستان له بشر دوستانه او پراختیايي پروګرامونو سره دوه اعشاریه ۱۲۲ میلیون ډالره مرسته کوي.
د جاپان سفارت د اعلان له مخې، د دغه هېواد نوې مرسته د جاپان د ۲۰۲۰ مالي کال له تکمیلي بودیجې څخه ورکول کېږي او د جینوا په کنفرانس کې د جاپان د ژمنو په پوره کېدو کې یو ګام دی.
د جاپان د بهرنیو چارو وزیر موتګي توشیمتسو د جینوا په غونډه کې چې د تېر میلادي کال په نومبر میاشت کې جوړه شوه، له ۲۰۲۱ تر ۲۰۲۴ کال پورې له افغانستان سره د خپل هېواد د ۱۸۰ میلیون ډالري مرستې ژمنه اعلان کړه.
په کابل کې د جاپان سفارت د یوې خبرپاڼې په خپرولو سره وېلي چې ددغه هېواد دوه اعشاریه ۱۲۲ میلیون ډالري مرسته په روان میلادي کال کې ورکول کېږي او په ټول افغانستان کې هغه ۱۷بشردوستانه او پراختیايي پروژې تمویلوي چې د ژوندانه د وضعیت د ښه کولو په موخه برابرې شوې دي.
له افغانستان سره د جاپان مرستې په بشري او پرمختیايي چارو کې د نړیوالو سازمانونو او بنسټونو له خوا اجرا کېږي.
د مرستې د نوې بستې په اعلان سره، له ۲۰۰۱ میلادي کال راهیسې له افغانستان سره د جاپان د ټولو مرستو کچه ۹ اعشاریه شپږ میلیارد ډالرو ته رسېږي. دا مرستې په افغانستان کې د امنیت، کرنې، د کلیو د پراختیا، انساني ظرفیتونو د لوړولو، پوهنې، روغتیا، بېخ بنسټونو، کلتور او ملت جوړونې د هڅو په برخو کې لګول شوې دي.