۸صبح، کابل: په افغانستان کې د ملګرو ملتونو ښوونیز، علمي او کلتوري سازمان (یونیسکو) وايي چې یوازې ۴۳ سلنه هېوادونو رسنیز او اطلاعاتي سواد په خپل ملي ښوونیز نصاب کې ځای پر ځای کړی دی.
نوموړي بنسټ یکشنبه د لړم پر ۳مه د مصنوعي ځیرکتیا او ډیجیټلي پلاټفورمونو د پراختیا په پېر کې د رسنیز او معلوماتي سواد د مهارتونو پر زده کولو ټینګار کړی دی.
یونیسکو له ښوونکو غوښتي چې په درسي ټولګیو کې د رسنیز سواد په شاملولو، معلوماتو ته د لاسرسي او د ارزونې او کارونې په برخه کې د زدهکوونکو مهارتونه پیاوړي کړي.
دا په داسې حال کې ده چې پر افغانستان د طالبانو له واکمنېدو وروسته د هېواد ښوونیز نظام له محدودیتونو سره مخ شوی دی.
یونیسکو او د ملګرو ملتونو د ماشومانو د ملاتړ صندوق (یونیسف) د تلې پر ۳۰مه په خپاره کړي راپور کې ویلي چې په افغانستان کې د لومړنیو زدهکړو د عمر ۵۳ سلنه ماشومان رسمي زدهکړو ته لاسرسی نه لري.
د راپور له مخې، له ۲۰۲۱ کال راهیسې څه باندې ۲.۶ میلیونه نجونې له منځنیو زدهکړو بېبرخې شوې دي.
دغه راز، ۹۳ سلنه ماشومان له لومړنیو زدهکړو وروسته نه شي کولی د عمر له کچې سره برابر ساده متن ولولي یا پرې پوه شي.
