کابل د نړۍ ترټولو ککړ ښار وبلل شو

د امریکا د هواپېژندنې اداره (Air Visual) چې د نړۍ د ښارونو د هوا د وضعیت ارزونه کوي، د لیندۍ په ۲۹ نېټه یې په خپلو څېړنو کې، کابل د نړۍ د تر ټولو ککړې هوا لرونکی ښار وبوله.
ددې بنسټ د درجه بندۍ له مخې، کابل د ۳۲۷ درجې سره، د هوا د ککړتیا له پلوه د ټولو ښارونو په سر کې دی او د پاکستان لاهور په ۳۰۲ او د هند ډیلي بیا په ۲۸۲ درجه کې دوهم او درېيم ځای لري.
دغه بنسټ د کابل څلور برخې د امریکا سفارت، خواجه رواش، قابلبای، وزیر محمداکبرخان او د ملګروملتونو سازمان عملیاتي کمپلکس سیمې ارزولې دي. په دغو برخو کې د هوا د ککړتیا کچه ۳۷۹، ۳۵۱، ۲۷۴ او ۷۶ درجې بلل شوې ده.
د هوا د ککړتیا د اندازې له مخې، ۳۲۷ درجه ککړتیا د خطرناک وضعیت ښودنه کوي.
د هوا د ککړتیا په دغه ارزونه کې، د کابل ښار په هر متر کې د ککړو ذرو کچه ۲۷۸ بلل شوې ده.
دغه بنسټ کابل ښاریانو ته سپارښتنه کړې چې ماسکونه وکاروي او د کړکیو او د هواکشونو په لګولو سربېره، له کوټو بهر له تمریناتو ډډه وکړي.
کابل ښار په وروستیو کلونو کې په ځلونو د نړۍ په کچه د ککړې هوا له پلوه په لومړي سر کې بلل شوی دی.
له بلې خوا په روان کال کې د کورونا د دوهمې څپې خپرېدل او د کووېد نولس ناروغۍ له امله د مړینې زیاتوالی، ددې لامل شوی چې د پلازمیني د هوا د ککړتیا په هکله اندېښنې زیاتې شي.
که څه هم د چاپېریال ساتنې ملي ادارې له دې مخکې د (Air Visual) بنسټ کړنې تر پوښتنې لاندې راوستې وې، خو په تېرو ورځو کې هم د نوموړې ادارې له خوا ورکړل شوې شمېرې ښيي چې د کابل ښار په ځینو برخو کې د دوه نیم مایکرومتري ناوړه ذرو کچه په هر متر کې له ۲۰۰ هم زیاته شوې ده.
له دې وړاندې، د چاپېریال ساتنې ملي ادارې د لوړپوړو ودانیو او لوګي لرونکو ځایونو خاوندانو ته خبرداری ورکړی و چې د لوګي د فلترونو پر لګولو سربېره د لوګي لرونکو سون توکو له کارولو ډډه وکړي.
د ویلو ده چې په (Air Visual) وېبپاڼه کې د ښارونو د ککړتیا د کچې په اړه مالومات په هر ساعت کې بدلېږي.