۸صبح، کابل: د افغانستان لپاره د روسیې د ولسمشر ځانګړي استازي ضمیر کابلوف ویلي چې د روان میلادي کال په لومړیو شپږو میاشتو کې د روسیې او افغانستان ترمنځ د سوداګرۍ کچه دوه برابره شوې ده.
کابلوف دا څرګندونې جمعه د تلې پر ۲۴مه، د منځنۍ اسیا او افغانستان د امنیت په اړه یوې غونډې کې کړې دي. په دې غونډه کې د ټوليز امنیت تړون سازمان، د همګټو هېوادونو او د شانګهای همکاریو سازمان استازو ګډون درلود.
هغه د دواړو هېوادونو ترمنځ د سوداګرۍ مطلقې کچې ته په نغوتی سره ویلي چې د امریکا او ناټو له شل کلن پوځي حضور وروسته په افغانستان کې شته شرایطو ته په پام سره، د سوداګرۍ دغه زیاتوالی د پام وړ اهمیت لري.
کابلوف ټینګار کړی چې د سوداګرۍ د ودې بهیر باید پایېدونکی او تدریجي وي او روسیه به د دغه بهیر د ساتلو لپاره هڅې وکړي.
د روسیې د ولسمشر ځانګړي استازي همداراز ویلي چې د روسیې او افغانستان ترمنځ د متقابلو ګټو پر بنسټ رغنده همکاري د رامنځته کېدو په حال کې ده.
