په کندهار کې د ښځو چارو ریاست له لوري زیات شمېر بېوزلو، بېځایه شويو ښځو لپاره په څو برخو کې د مسلکي زده کړو زمینه برابره شوې ده.
په دغه مرکز کې د ۱۲۰ بېځایه شوې او کډوالې ښځې د ګنډلو، سینګار او کورشنیل زده کړې کوي. دا مېرمنې په دې کار خوښي څرګندوي او وايي چې د راتلونکي لپاره یې د اقتصاد د پیاوړتیا لاره همدا ده.
دغه ښځې وايي چې حرفوي زده کړې یې په ژوند کې مثبت بدلون راولي او کولای شي له دې لارې خپل اقتصاد پیاوړی کړي.
ددغو ښځو له ډلې پنځه ويشت کلنه سونا، چې د جګړو او تاوتریخوالي له امله کندهار ښار ته راکډه شوې، دا مهال ددې ولایت د عينومېنې د مسلکي زده کړو په مرکز کې د خياطۍ په زدکړو بوخته ده. سونا وايي د خپلې کورنۍ د اقتصادي اړتياوو د پوره کولو لپاره يې د کسب زده کړې ته مخه کړې ده. هغه وايي چې ددې کسب زده کړې ته به په کور کې دوام ورکوي چې له خپلو نارينه وو سره د کور په لګښتونو کې همکاري وکړي.
د جګړو ځپلو کورنیو ترڅنګ هېواد ته له کډوالۍ راستنې شوې نورې مېرمني، سلما او حجاڼي هم د مسلکي زده کړو په دې مرکز کې بوختې دي. دوی وایي چې په هېواد کې پرلپسي ناورينونو او جګړو مېرمنې اړ کړې چې د خپل ژوند او کورنيو د پايښت لپاره خوارۍ وګالي. سلما او حجاڼي وايي چې له دې لارې یوازې خپل ژوند نه؛ بلکي د اولادونو ښه راتلونکی هم جوړولای شي؛ ځکه ترلاسه شوې پیسې د اولادونو پر تعليم لګوي.
په کندهار ښار کې دا مهال ددې ولایت له لسو ولسوالیو څخه شاوخوا شل زره بېځایه شوې کورنۍ ژوند کوي، چې ډېری یې د ژوند له ګڼو ستونزو سره مخامخ دي.
د کندهار د ښځو چارو رئیسه روقيه اڅکزۍ وایي چې د مېرمنو د وضعيت د ښه کېدو لپاره يې تر پخوا اسانتیاوې کمې شوې، خو دوی د نړيوالې ټولنې د بديل معشيت او ناقانونه کډوالۍ د پروګرام په مرسته د مېرمنو د لاسنیوي لپاره د مسلکونو د زده کړې لړۍ پېل کړې ده. نوموړې وايي چې هڅه کوي د کسبونو د زده کړې ترڅنګ د ښځو لپاره د کرنې برخه کي هم پروګرامونه عملي کړي چې د تېر په څېر یو ځل بیا په کندهار کې زیاتې میرمنې د چرګانو او څارویو او نباتاتو په روزنه بوختې شي.
ددې ترڅنګ کندهارۍ مېرمن سوله او مریم وايي چې ښځې له ډېرو اسانو لارو کولای شي د سولې په برخه کې کار وکړي، نو اړینه ده چې د سولې په برخه کې هم کندهارۍ ښځو ته ځانګړې پاملرنه وشي.
هغوی پر طالبانو غږ کوي چې د سولې لاره خپله کړي چې نور د هېواد مېرمنې بې سرپرسته پاتې نشي.
له دې ټولو سره سره لاهم مېرمنې په کندهار کې د تاوتریخوالي له بېلابېلو ډولونو ځورېږي.
د کندهار د ښځو چارو ادارې د مارچ د اتمي، يا د ښځو د نړيوالي ورځې په مناسبت يو پېغام کې ویلي ؤ، چې د تېر کال راهيسې په دې ولایت کې د مېرمنو پر وړاندې ۲۳۹ د تاوتريخوالي پېښې ثبت شوې، چې د تېر کال په پرتله څو چنده زياتې دي.