۸صبح، کابل: د هېواد پخواني ولسمشر حامد کرزي پر اسراییلو د ایران د تېرې شپې توغندیز بریدونه «د ځان د دفاع لپاره مشروع حق» بللی دی.
کرزي یکشنبه د وري پر ۲۶مه په خپله اېکسپاڼه کې لیکلي چې په دې وروستیو کې د جګړو، ناورینونو او نړیوالو قوانینو څخه د سرغړاوي کچه زیاته شوې او په خبره یې، دې چارې نړیواله سوله له ګواښ سره مخ کړې ده.
نوموړي زیاته کړې: «په دمشق کې د ایران پر کونسلګرۍ د اسراییلو برید نوی هغه و چې د ایران اسلامي جمهوريت له خپل ځانه د دفاع لپاره د مشروع حق په توګه ځواب ورکړ.»
د کرزي په خبره، ایران د افغانستان ګاونډی دی چې په سختو حالاتو کې له افغانانو ولاړ و او په وینا یې، د هېواد اوسېدونکي هم له ایراني وګړو سره د «خواخوږۍ او پیوستون احساس» لري.
پخواني ولسمشر زیاته کړې: «د غزې جګړې هم ناوړه انساني ناروین رامنځته کړی، باید په سملاسي ډول اوربند وشي او د فلسطینیانو د حق په توګه یو خپلواک فلسطینی دولت رامنځته شي، څو هم کړکېچونه کم او هم په فلسطین او اسراییل کې د ملکي وګړو او زموږ د ټولې سیمې ژوند خوندي شي.»
بل پلوه، په مخکیني دولت کې د ملي روغې جوړې عالي شورا مشر عبدالله عبدالله د دغو بریدونو په تړاو ویلي چې اسراییلو په سوریه کې د ایران پر کونسلګرۍ برید سره نړیوال قوانین، نړیوال کنوانسیونونه، د ډيپلوماتیکو استازولیو خوندیتوب او نړیوال عرف تر پښو لاندې کړی دی.
نوموړي یادونه کړې چې د ایران غبرګون «دفاعي او د ملي حاکمیت ساتنې» لپاره و.
عبدالله زیاته کړې: «د اسراییل له لوري د ایران پر ضد هر ډول اقدام به د افغانستان او د سیمې او نړۍ پر حالت ناوړه اغېز پرېباسي.»
ورته مهال، نوموړي بیا په سولهییز ډول د سیمهییزو کړکېچونو د حل غوښتنه کړې ده.
د یادونې ده چې بیګا شپه ایران مخامخ پر اسراییلو د شاوخوا ۳۰۰ بېپیلوټه الوتکو، کروز او بالستیک توغندیو ګوزارونه کړي دي.
د طالبانو بهرنیو چارو وزارت هم پر اسراییلو د ایران برید «مشروع دفاعي اقدام» بللی دی.