۸صبح، کابل: پخواني ولسمشر حامد کرزي له پاکستانه غوښتي چې په دغه هېواد کې د افغان محصلانو د اقامت موضوع دې له نورو مسایلو سره نه ګډوي او له هغوی سره دې د اکاډمیکو اصولو له مخې چلند وکړي.
کرزي یکشنبه د زمري پر ۱۱مه په پاکستان کې د افغان محصلانو د ځورونې او د هغوی د ویزو له تمدید څخه د انکار په اړه خپاره شوي راپورونه د اندېښنې او خواشینۍ وړ بللي دي.
نوموړي ویلي چې افغان محصلان یوازې د لوړو زدهکړو د بشپړولو لپاره پاکستان ته تللي او هغوی ته دې د زدهکړو د دوام شرایط برابر شي.
د افغانستان پخواني ولسمشر له پاکستاني چارواکو غوښتي چې د افغان محصلانو اقامتي وضعیت ته پاملرنه وکړي او له هغوی سره داسې چلند وکړي چې په اکاډمیکو ځایونو کې معمول دي.
دا په داسې حال کې ده چې په وروستیو میاشتو کې په پاکستان کې افغان محصلان او کډوال له ګڼو ننګونو سره مخ دي.
