د امریکا ولسمشر ډونالډ ټرمپ د روسیې د تیلو پر دوو لویو شرکتونو بندیزونه لګولي دي.
رویټرز پنجشنبه د اکتوبر پر ۲۳مه راپور ورکړی چې له دې پرېکړې وروسته په نړیواله کچه د نفتو بیه درې سلنه لوړه شوې او ښايي هند هم له روسیې د تیلو پر واردولو غور وکړي.
د راپور له مخې، دغه بندیزونه د روسنېفت (Rosneft) او لوکاویل (Lukoil) لوی شرکتونه په نښه کړي؛ دا هغه دوه شرکتونه دي چې په نړیواله کچه د تېلو تولید څه باندې پنځه سلنه په واک کې لري.
روسیې بیا د امریکا نوې بندیزونه «بېګټې» بللې او اعلان یې کړې چې د اوکرایین د جګړې د پای ته رسولو په برخه کې یې شرایط نه دي پوره شوي، داسې شرایط چې کییف او ګڼ اروپايي هېوادونه یې د تسلیمېدو په مانا بولي.
دا پرېکړه داسې مهال شوې چې ټرمپ تېره اوونۍ اعلان وکړ چې غواړي ژر له خپل روسي سیال ولادیمیر پورتین سره وګوري څو د اوکرایین جګړې د ختمولو لپاره پر لارو چارو ورسره وغږېږي.
له دې سره هممهاله پر کییف د مسکو ډرون بریدونه پر دویمې پرلپسې شپې هم دوام کړی او اوکراییني چارواکو د نهو کسانو د ټپي کېدو خبر ورکړی دی.
د راپور له مخې، د روسیې دفاعي سیسټم هم د اوکرایین لسګونه ډرون شنډ کړي دي.
