۸صبح، کابل: د ملګرو ملتونو د بشر د استوګنې پروګرام وايي چې چټکې ښارمېشتېدنې، بېځایه کېدو او له ګاونډیو هېوادونو د کډوالو را ستنېدو په غیررسمي استوګنځایونو کې جنسیتي نابرابري لا پسې زیاته کړې ده.
د ملګرو ملتونو د بشر د استوګنې پروګرام یکشنبه، د کب پر ۱۷مه، راپور ورکړی چې د طالبانو تر واکمنۍ لاندې د ښځو د پیاوړتیا او کرامت ټولې لارې له منځه تللې دي.
په راپور کې راغلي دي: «د ښځو او نجونو لپاره په ځانګړې توګه د ښارونو په غیررسمي استوګنځایونو کې دغه محدودیتونه د استوګنې د ناامنۍ، د ځمکې د حقونو د ستونزې، نا امنې عامه فضا او د اوبو خدمتونو ته د محدود لاسرسي په ګډون له یو لړ ځانګړو زیانګالیو سره لا پسې زیات شوي دي.»
د ښځو د نړیوالې پیوستون په ورځ، په افغانستان کې ګڼو مرستندویو بنسټونو غوښتنه کړې چې طالبان دې پر افغان ښځو لګېدلي محدودیتونه لغوه کړي.
په افغانستان کې د ملګرو ملتونو د مرستندوی پلاوي دفتر (یوناما) په یوه راپور کې ویلي چې ښځې د نارینهوو پرتله څلور برابره کم عدالت ته لاسرسی لري.
