۸صبح، کابل: د طالبانو د رییس الوزرا سیاسي مرستیال مولوي عبدالکبیر په افغانستان کې د بېوزلۍ او بېکارۍ کچې راکمولو په برخه کې له نړیوالو د همکارۍ غوښتنه کړې ده.
مولوي عبدالکبیر دا څرګندونې سهشنبه د زمري پر ۲مه د «کار ملي کنفرانس» ته په وینا کې کړې دي.
نوموړي زیاته کړې چې بېکاري له مخکېني حکومت ورته په «میراث» پاتې ده.
هغه زیاته کړې: «دا مهال [طالبان] له ګاونډیو او یو شمېر نورو هېوادونو سره په خبرو بوخت دي، څو افغان کارګران په قانوني توګه ومني، کرنیزو توکو ته په بازارونو کې د خرڅلاو زمینه برابره او پر افغاني صادراتو ګمرکي تعرفې کمې کړي.»
مولوي عبدالکبیر پر نړیوالو غږ کړی چې پر طالب مشرانو لګول شوي محدودیتونه ختم کړي او زیاته کړې ده چې نړیواله ټولنې دې له طالبانو سره د یو «فعال غړي» په توګه همکاري وکړي.
د یادونې ده چې طالبان په خپله درې کلنه واکمنۍ کې توانېدلي نه دي چې خلکو ته اړینې کاري بوختیاوې برابرې کړي.
د طالبانو بهرنیو چارو وزیر امیرخان متقي هم په دې کنفراس کې ویلي چې واک ته د دغې ډلې له رسېدو وروسته د خلکو امنیت ټينګ شوی؛ خو په وینا یې، اصلي ننګونه کار او اقتصاد دی.
