۸صبح، کابل: د طالبانو د ریاستالوزرا سیاسي مرستیال مولوي عبدالکبیر ویلي چې مخکېنو حکومتونو د افغانستان د ابادولو هوډ نه درلود او په خبره یې، د روغتیايي سکتور په شمول یې د افغانستان سیستمونه له ستونزو سره مخ کړي وو.
نوموړي سهشنبه د وږي پر ۱۳مه د کابل طبي علومو پوهنتون د ۱۴۰۳لمریز کال محصلینو په فراغت غونډه کې ویلي چې په افغانستان کې «وحشت، بربریت او قوم جنګي» نه شته او سراسري امنیت ټينګ دی.
هغه له نړیوالو مرستندویه ادارو او روغتیا نړیوال سازمان څخه غوښتي چې په افغانستان کې له روغتیايي سیستم سره خپلې مرستې ډېرې کړي او ټولو افغانانو ته د باکیفیته خدماتو په وړاندې کولو کې ونډه واخلي.
عبدالکبیر زیاته کړې چې د افغانستان روغتیايي سکتور د «منفي تبلیغاتو، مافیايي کړیو او د روغتیايي مرکزونو د کمزوري ظرفیت» له امله بې اعتباره شوی وو او ناروغان به د درملنې لپاره ګاونډیو هېوادنو ته تلل.
نوموړي ویلي: «خو د [طالبانو] په راتګ سره په هېواد کې مافیايي کړۍ له منځه لاړې، اصلاحات رامنځته شول او کوښښ کېږي چې د روغتیايي خدماتو کیفیت هم لوړ شي.»
د یادونې ده چې طالبان په تېرو ۲۰ کالو کې د هېواد په بېلابېلو برخو کې د سترو پرمختیايي پروژو د پلي کېدو پر وړاندې لوی خنډ بلل کېده.
واک ته د طالبانو له بیا رسېدو وروسته په هېواد کې روغتیايي سیستم له ګڼو ننګونو سره مخ شو.
د طالبانو محدودو پالیسو د هېواد اوسېدونکو په ځانګړې توګه ښځو ته د روغتیايي خدماتو د وړاندې کولو په برخه کې جدي خنډونه رامنځته کړې دي.
څه موده وړاندې روغتیا نړیوال سازمان ۲۰۲۴ کال د افغانستان د روغتیايي سکتور لپاره له ننګونو ډک کال بللی و.
