دفاع وزارت: د ملي اردو چورلکه د علي پور له خوا غورځول شوې ده

د ملي دفاع وزارت چارواکي وایي: اسناد او شواهد ښيي چې د وردګو ولایت په بهسودو ولسوالۍ کې د ملي اردو چورلکه د علي پور له خوا غورځول شوې ده.
د ملي دفاع وزارت د ویاند مرستیال فواد امان، د کب په دېرشمه په خپله ټویټر پاڼه لیکلي، څېړنې ښيي چې دا چورلکه په بهسودو ولسوالۍ کې د علي پور د جنګیالیو له خوا ویشتل شوې ده.
هغه زیاته کړه: «ملي دفاع وزارت ددغې ترهګرې پېښې د مړو غچ اخلي او عاملینو ته به یې سزا ورکړي.»
د ویلو وړ ده چې ملي دفاع وزارت د یوې اعلامیې په خپرولو سره وویل چې د هوايي ځواک یوه ام ۱۷ ډوله الوتکه په وردګو ولایت کې غورځېدلې ده. په دغه پېښه کې نهه تنه ووژل شول.
د رپوټونو له مخې، علي پور له ځینو رسنیو سره په مرکه کې د خپلو جنګیالیو له خوا ددې چورلکې نسکورول تایید کړي دي. نوموړي زیاته کړې چې دا چورلکه له هغې وروسته په نښه شوه چې د دوی پر جنګیالیو یې بریدونه کول.