۸صبح، کابل: د طالبانو د بهرنیو چارو وزیر امیرخان متقي د روسیې د بهرنیو چارو له وزیر سرګي لاوروف سره کتلي او پر دوه اړخیزو اړیکو او اقتصادي – سوداګریزو همکاریو پر پراختیا یې خبرې کړې دي.
د طالبانو د بهرنیو چارو وزارت دوشنبه د تلې پر ۱۳مه په خپرې کړې خبرپاڼې کې لیکلي چې په دې لیدنه کې پر سیمهییزو مسایلو او د دواړو خواوو ترمنځ د سیاسي سلامشورو پر دوام هم بحث شوی دی.
متقي د دواړو خواوو ترمنځ د سیاسي تفاهم پر پیاوړتیا ټينګار کړی او په اقتصادي، سوداګریزو او ترانزیټي برخو کې یې د همکاریو د پراختیا غوښتنه کړې ده.
نوموړي ویلي چې له روسیې سره د اوږدمهاله همکاریو پراختیا ته ارزښت ورکوي او د سیمهییز ثبات د ډاډمنېدو لپاره یې د همکاریو پر دوام ټينګار کړی دی.
سرګي لاوروف هم د دواړو خواوو ترمنځ د سیاسي سلامشورو د دوام پر ارزښت ټينګار کړی او له طالبانو سره یې د اقتصادي او سوداګریزو اړیکو د پیاوړتیا په برخه کې د روسیې لېوالتیا څرګنده کړې ده.
