۸صبح، کابل: د افغانستان لپاره د ملګرو ملتونو د بشري حقونو ځانګړي راپور ورکوونکي ریچارډ بېنېټ ویلي چې په افغانستان کې د لسیزو جګړو او له بشري حقونو د جدي سرغړونو په اړه دې هر اړخیز او بې پرې حساب کتاب وشي.
بېنېټ دوشنبه د تلې پر ۱۳مه په افغانستان کې د امریکا د جنګي جنایتونو په اړه د بشري حقونو د څار بنسټ راپور ته په اشاره ویلي چې د لسیزو جګړو او له بشري حقونو د جدي سرغړونو پایلې لا هم پر افغانانو اغېز کوي.
نوموړي ویلي: «پر افغانستان د امریکا په مشرۍ د یرغل له پیله ۲۵ کاله وروسته، د لسیزو جګړو او له بشري حقونو د جدي سرغړونو پایلې لا هم پر افغانانو اغېز کوي، په داسې حال کې چې د دغو مواردو په اړه ډېر کم حساب کتاب شوی دی.»
هغه ټینګار کړی چې حساب کتاب دې هر اړخیز او بېپرې وي او د ټولو غاړو له خوا او په ټولو وختونو کې له بشري حقونو سرغړونې دې پکې وي.
بېنېټ ویلي چې له بشري حقونو د سرغړونو د قربانیانو او ژوندي پاتې کسانو حقونه او تجربې دې د حسابورکولو او عدالت بهیر په مرکز کې ځای ولري.
