۸صبح، کابل: د طالبانو د بهرنیو چارو وزیر امیرخان متقي په کابل کې د هند سفارت له شارژدافیر یتین پټيل سره کتلي او پر دوه اړخیزو اړیکو یې خبرې کړې دي.
د طالبانو د بهرنیو چارو وزارت چهارشنبه د تلې پر ۲۲مه په خپرې کړې اعلامیې کې لیکلي چې په دې لیدنه کې د دوه اړخیزو اړیکو او اقتصادي همکاریو پر پراختیا ټينګار شوی دی.
د اعلامیې له مخې، متقي پاټیل ته په نوي ماموریت کې د بریالیتوب هیله کړې او ویلې یې دي چې طالبان د متوازن سیاست له مخې له هند سره اړیکو ته ارزښت ورکوي.
متقي زیاته کړې چې د افغانستان او هند ترمنځ د سوداګرۍ حجم په زیاتېدو دی او د دواړو لورو له ظرفیتونو په ګټې اخیستنې اړتیا ده چې «د حکومتي او خصوصي» سکټورونو ترمنځ اړیکې او همکارۍ زیاتې شي.
یتین پاټيل ویلي چې هند له افغانستان سره په اقتصادي، سیاسي او بشري برخو کې تعامل او اړیکو ته پراختیا ورکول غواړي.
