د وتلي سياستوال عثمان کاکړ مرموزه وژنه او غبرګونونه

وتلی پښتون سياستوال او د پښتونخوا ملي عوامي ګوند مخکښ غړی عثمان کاکړ د روان کال د غبرګولي مياشتې په ۲۸مه د جمعې په ورځ سخت ټپي شو او د ژورو ټپونو له امله يې د کراچۍ اغاخان روغتون کې خپل ژوند له لاسه ورکړ.

د نوموړي د ټپي کېدو په اړه ضد او نقيض ادعاوې کېږي. په لومړيو کې داسې راپورونه خپاره شول چې ګواکې نوموړی په خپل کور کې د غورځېدو له امله سر يې دېوال سره لګېدلی ؤ او شديده ضربه يې ليدلې وه. خو د عثمان کاکړ د کورنۍ غړي، نږدې کسان يې او د پښتونخوا فعالين بيا وايي چې نوموړی د پاکستان اسختباراتو له لورې په قصدي ډول ټپي شوی او همدغه ټپي کېدل يې د مړينې لامل وګرځېد.

د پښتون ژغورنې غورځنګ مخکښ غړي محس داوړ د عثمان کاکړ له مړينې وروسته په خپل ټوېټر وليکل، داسې ښکاري چې هغه قتل شوی دی. داوړ زياته کړې وه چې «د عثمان کاکړ ورور منان کاکړ سره په اړيکه کې وم او ډاکټرانو سره مې هم خبرې وشوې، د هغوی د څرګندونو مطابق د عثمان کاکړ په سر کې ژور ټپ د پرېوتو له امله نه، بلکې ښه کلک برید پرې شوی او داسې ښکاري چې هغه قتل شوی. مونږ د عثمان لالا له کورنۍ سره ولاړ یؤ او د پېښې د پوره پلټنې غوښتنه کوو».

ويل کېږي چې عثمان کاکړ له خپلې مړينې څه موده مخکې په خپلو څرګندونو کې ويلي ؤ چې د پاکستان استخبارات دې د افغانستان په مسائلو کې لاسوهنه ودروي. نوموړي همداراز دا هم ويلي ؤ چې که پر ده يا هم د کورنيو غړو باندې يې څه وشي، نو مسؤليت يې د پاکستان استخباراتو په غاړه دی.

د کاکړ مرموزې مړينې د افغانستان او پښتونخوا په شمول د نړۍ په مختلفو سيمو کې ګڼ غبرګونونه راوپارول.

افغان ولسمشر محمد اشرف غني، مخکیني ولسمشر حامد کرزي، د ملي امنيت شورا سلاکار حمدالله محب، د بهرنيو چارو وزير محمد حنيف اتمر او د سرحدونو او قبايلو چارو وزير محب الله صميم په ګډون ګڼو افغان چارواکو او سياستوالو د عثمان کاکړ مړينه ستره ضايعه وبلله او له نوموړي څخه يې د افغانانو او په ځانګړي ډول د پښتنو د رسا غږ په توګه يادونه وکړه.

ولسمشر غني په يوه پيغام کې عثمان خان کاکړ د هر ډول تشدد، ظلم او جبر پر وړاندې د خپلو ولسونو او په ځانګړي ډول د مظلومو او محکومو خلکو رسا غږ وبله او دا يې د ټولو پښتنو لپاره ستره ضايعه وبلله.

د ملي امنيت شورا سلاکار حمد الله محب وويل: که څه هم د عثمان کاکړ تشه به ډکه نه شي، مګر د هغوی د ارمانونو او هيلو لاره به هېڅکله تشه نه شي.

تېره ورځ ناوخته د افغانستان ملي امنیت شورا اعلان وکړ، چې افغان دولت غوښتل د ملي امنیت شورا یو پلاوی د عثمان کاکړ جنازې ته واستوي خو د پاکستان حکومت یې مخه نېولې ده.

د دغې شورا څخه په خبرپاڼه کې راغلي چې غوښتل یې په خپل استازيتوب د ملي امنيت د سلاکار مرستيال سرور احمدزی او د قبايلو چارو وزير محب الله صميم د عثمان کاکړ په جنازه کې د ګډون لپاره واستوي؛ خو پاکستان يې مخنيوی کړی دی.

د عثمان خان کاکړ جنازه پرون چهارشنبه د نوموړي پلرني ټاټوبي «مسلم باغ» کې د زرګونه کسانو په ګډون سره ترسره شوه.

د پلازمېنې کابل په شمول مختلفو ولايتونو کې هم د عامو خلکو له خوا د عثمان کاکړ غايبانه جنازې ترسره شوې .

عثمان کاکړ په ۱۹۶۱ کال کې د بلوچستان د کلا سیف الله په مسلم باغ کې دې نړۍ ته سترګې غړولې وې او د ۲۰۲۱ کال د جون په ۲۱مه نېټه ومړ.

هغه د پښتونخوا ملي عوامي ګوند او محمود خان اڅکزي تر مشرۍ لاندې د پښتنو لپاره سیاست کاوه او د پښتنو او افغانانو په اړه به يې غږ په ډاګه پورته کاوه.

کاکړ د پاکستان د سنا مجلس غړی پاتې شوی ؤ، د خپل ګوند تر څنګ د پښتون ژغورنې غورځنګ غړی هم ؤ، مدني فعالیت یې هم کاوه او د پښتنو د حقونو لپاره يې هلې ځلې کولې.

کاکړ په ۱۹۸۷ کال کې د کوټې د لاء پوهنتون څخه د قانون په برخه کې د فراغت سند ترلاسه کړ او د پوهنتون له وخته يې سیاست ته مخه کړې وه. په ۱۹۹۶ کال کې هغه د پښتونخوا ملي عوامي ګوند سره یو ځای شو او په ۲۰۱۵ کال کې بیا د پاکستان د سنا مجلس غړی شو.

عثمان کاکړ څو ورځې وړاندې په یوه مرموزه پېښه کې سخت ټپي شو، چې بیا وروسته د کراچۍ اغاخان روغتون ته ولېږدول شو او هلته يې د ژورو ټپونو له امله ساه ورکړه.