۸صبح، کابل: د افغانستان د ملي امنیت پخواني رییس رحمتالله نبیل له امریکایي مارک فري ریچز سره د بشر نورزي د بدلولو په غبرګون کې وایي، چې له نشه یي توکو سره د طالب مشرانو ژور تړاو نه شلېدونکې او د انکار نه وړ دی او سپینولای یې نه شي.
د افغانستان د ملي امنیت پخواني رییس دوشنبه د وږي پر ۲۸ د یوه ټویټ په خپرولو لیکلي: «ځینې هڅه کوي، چې حاجي بشر د طالبانو لوړپوړی غړی معرفي کړی او هڅه کوي طالب مشران په نشه یي توکو کې له لاس لرلو سپین کړي؛ داسې حال، چې حاجي بشر په ۲۰۰۵ کال کې په نیویارک کې ونیول شو.»
هغه زیاته کړې: «که حاجي بشر یوازې د طالبانو ملاتړی او ملاعمر ته نږدې کس و په نیویارک کې یې څه کول؟ که هغه یوازې د نشه یي توکو قاچاقبر و نو طالبانو یې د ازادۍ لپاره ولې دومره هڅه وکړه او د ده له خوشي کېدو دومره خوښ دي؟»
دا په داسې حال کې ده، چې په ګوانتانامو کې د طالبانو وروستی بندي بشر نورزی نن د امریکایي وګړي مارک فري ریچز په بدل کې خوشی شوی او دغه تبادله د کابل په هوایي ډګر کې ترسره شوې ده.
د طالبانو د بهرنیو چارو وزارت په یو لړ مراسمو کې د نشه یي توکو پر قاچاق د تورن کس نورزي ازادي لمانځلې ده.
د ویلو ده، چې بشر نورزی په ۲۰۰۵ کال کې د هیرویینو د قاچاق په تور د امریکا له خوا نیول شوی و.